गोकुलेश्वर। दार्चुला जिल्लाको शैल्यशिखर नगरपालिकाका मेयर अमर सिंह धामीले नागरिकको जीवन रक्षाको लागि कोरोना भ्याक्सिन उपलब्ध गराइदिन स्वास्थ तथा जनसंख्या मन्त्रालयलाई भ्याक्सिन उपलब्ध गराइदिन अनुरोध गरेका छन ।
कोरोना भाइरसको नयाँ भेरियन्टको संक्रमण फैलिँदै गएको अवस्थामा शैल्यशिखर नगरपालिकाका जनताहरुलाई कोरोना संक्रमणबाट बचाउन आफ्नो दायित्व रहेको उनको भनाइ छ । उनले स्वास्थ्य मन्त्रालयलाई कोरोना विरुद्धको भ्याक्सिन चाँडो भन्दा चाँडो उपलब्ध गराउन आग्रह समेत गरेका छन् ।
नागरिकको जीवन रक्षाका लागि नेपाल सरकारको मुल्य र मापदण्ड अनुसार (कोभिड–१९) भ्याक्सिन, कोरोनाका बिरामीहरुको लागि निःशुल्क औषधी र कोरोना भाइरसबाट आमाबुबा दुवै गुमाउने टुहुरा बालबालिकाहरुको जीवनयापन तथा शिक्षा स्वास्थ्यको लागि सरकारले जिम्मेवारी लिनको लागि आवश्यक व्यवस्थापनको लागि समेत पहल गरेको बताए । मेयर धामीले मुख्यमन्त्री तथा मन्त्री परिषदको कार्यालय, सामाजिक विकास मन्त्रालय, स्वास्थ मन्त्रालय धनगढी कैलालीलाई समेत पत्राचार गरिसकेको बताए ।
