गोकुलेश्वर। धनगढी विमानस्थलबाट सुदूर पहाडका तीन जिल्लामा नियमित उडान सुरु भए पनि बैतडीका लागि उडान सेवा सुचारु भएको छैन् ।
बिहीबार देखि बझाङ, बाजुरा र अछामका लगि नियमित उडान सुरु गरियो । तर, बैतडीको पाटनका लागि उडान सुरु गरिएन् । डेढ वर्षदेखि पाटन विमानस्थलमा हवाई सेवा बन्द हुँदा नागरिकलाई समस्या भएको छ ।
गत चैतदेखि बझाङ, बाजुरा र अछामको हवाई उडान नगरेको समिट एयरले बिहीबारदेखि नियमित उडान सुरु गरेको छभने २०७८ चैत १० गते अन्तिम उडान गरेको समिट एयरले बैतडीका लागि हवाइ सेवा सुचारु गरेको छैन् ।
समिट एयरले २०७८ चैत १० त्यसयता पाटन विमानस्थलबाट कुनै उडान गरेको छैन् । यात्रु अभावका कारण उडान भर्न नसकिने समिट एयर बैतडी प्रतिनिधि कृष्णदत्त भट्ट बताउँछन् ।
पाटन–धनगढी १७ मिनेटको हवाई दूरीका लागि शुरुमा तीन हजार सात सय रुपैयाँमा हवाई उडान हुने गरेको थियो । पछिल्लो समय बढेर पाँच हजार रुपैयाँ पुगेको थियो ।समिट एयरले प्रत्येक बिहीवार धनगढी–पाटन–धनगढी उडान गर्दै आएको थियो ।
हवाई सेवाका कारण यहाँको आन्तरिक धार्मिक पर्यटन प्रवर्धन र व्यापार–व्यवसाय फस्टाउने अपेक्षा गरिए पनि सञ्चालनमा आएको एक वर्षमै विमानस्थल बन्द हुँदा हवाई सेवाबाट समेत वञ्चित हुनुपरेको स्थानीयवासीको भनाई छ । हवाई उडान बन्द हुँदा आकस्मिक रूपमा प्रदेश राजधानी धनगढी जाने यात्रु र बिरामीलाई समस्यामा हुने गरेको छ ।
२०३५ सालमा सञ्चालनमा आएको पाटन विमानस्थल पछिल्लो समय पुनःनिर्माण भएपनि सञ्चालनमा आएको छैन् । यात्रु अभाव भएको भन्दै उडान बन्द भएपछि अहिले धावनमार्गमा गाडी सिक्ने,खेल्ने तथा टिकटक बनाउने स्थलका रुपमा परिणत भएको छ ।
२०३२ साल देखि निमार्ण सुरु भएको पाटन विमानस्थल २०३५ साल देखि सञ्चालनमा आएको थियो । २०५२ देखि हवाई सेवा बन्द भएको विमानस्थल २०५८ सालमा सशस्त्र द्धन्द्धको बेला तत्कालीन विद्रोही माओवादीले बम हानेर कार्यालय सँगै टावर ध्वस्त बनाएको थियो ।
फेरि २०७३ सालमा ११ करोडको लागतमा विमानस्थलको धावन मार्ग,टावर र कार्यालय लगायतको संरचना पुननिर्माणको सम्झौता भइ काम सम्पन्न गरिएको थियो ।
०७७ असोज देखि पाटन विमानस्थल आंशिक रुपमा फेरि सञ्चालनमा आएको थियो ।
