गोकुलेश्वर। आगामी आर्थिक वर्षको नीति, कार्यक्रम तथा बजेट निर्माण गर्न दार्चुलाका स्थानीय तहहरुले सुझाव माग गरिरहेका छन् । ९ स्थानीय तह रहेको दार्चुलामा विभिन्न स्थानीय तहहरुले आगामी आर्थिक वर्ष २०७८/७९ को बजेट, नीति र कार्यक्रम कस्तो बनाउने भन्ने बिषयमा सुझाव माग गरिरहेका हुन् ।
उनीहरुले आर्थिक विकास क्षेत्र, सामाजिक विकास क्षेत्र, वन वातावरण तथा विपद व्यवस्थापन र सुशासन तथा संस्थागत विकासका लागि उपयुक्त सुझाव दिन माग गरेका छन् । सोमवार जिल्लाको लेकम गाउँपालिकाले जेठ मसान्तसम्म सुझाव दिन अनुरोध गरेको छ ।
यसअघि जिल्लाको व्याँस गाउँपालिका, दुहुँ गाउँपालिका र महाकाली नगरपालिकाले सुझाव माग गरि संकलन गरिरहेका छन् । कोरोना संक्रमणका कारण भौतिक उपस्थिति गर्न सम्भव नभएकाले इमेल,सामाजिक संजाल मार्फत सुझाव दिन सकिने स्थानीय तहहरुले जनाएका छन् । केही स्थानीय तहहरुले सुझाव संकलनका लागि जुम मिटिङको आयोजना समेत गर्ने भएका छन् ।
