गोकुलेश्वर । सुदूरपश्चिमका पहाडी र तराई जिल्ला जोड्ने भिमदत्त राजमार्ग आज बिहीबार ६ घण्टा बन्द हुने भएको छ ।
पहिरोले क्षतिग्रस्त राजमार्गको मर्मत सम्भारका लागि आज दिउँसो १२ बजेदेखि साँझ ६ बजे सम्म सडक बन्द गरिने प्रदेश ट्राफिक प्रहरी कार्यालय अत्तरियाले जनाएको छ ।
राजमार्ग अन्तर्गत कैलालीको गोदावरी नगरपालिका ४ बुढीतोलामा यही साउन २२ गतेका दिन पहिरोले सडक भासिएको थियो । सडक भासिएपछि नयाँ ट्रयाक खोलेर गाडी आवतजावत भइरहेका छन् ।
नयाँ ट्रयाक खोलेको ठाउँमा मर्मत सम्भारका लागि दिउँसो राजमार्ग बन्द गरिने ट्राफिक प्रहरीले जनाएको छ ।
सवारी आवागमनलाई सहज बनाउन सडक मर्मत सम्भार गर्न लागिएको हो ।
