गोकुलेश्वर। नेकपा (एकीकृत समाजवादी)का प्रवक्ता एवं उपमहासचिव जगन्नाथ खतिवडाले ललिता निवास प्रकरणमा पार्टी अध्यक्ष एवं पूर्वप्रधानमन्त्री माधवकुमार नेपालमाथि छानबिन गर्ने बाटो खोलिनुलाई सामान्य रुपमा लिएको बताएका छन् ।
‘कसैले मुद्दा हाल्यो भने अदालतले केही न केही बोल्नैपर्छ, बोल्यो । यो कुनै अनौठो विषय होइन । अत्तालिने विषय पनि होइन । चिन्तित हुनुपर्ने विषय पनि होइन । कसैमाथि प्रश्न उठेपछि सत्य, तथ्य र नियतको जाँच गर्ने कुरा स्वाभाविक हो । माधव नेपालले पनि बारम्बार आफूमाथि छानबिन वा अनुसन्धान गर्न जोड दिनुभएको छ । यसमा आपत्ति जनाउनुपर्ने कुरै छैन,’ उनले भने ।
माधव नेपालले कसैलाई लाभ दिने र राज्यको सम्पत्ति हिनामिना गर्ने नियतवश कुनै काम नगरेको जिकिर पनि खतिवडाले गरे ।
उनले भने, ‘त्यस्तो उद्देश्यले उहाँले कुनै नीतिगत निर्णय गर्नुभएको छैन । सोधीखोजी छानबिन गर्नु नै कारबाही होइन । अभियोग पुष्टि भए मात्र कारबाही हुने हो ।’
