गोकुलेश्वर । इलाका प्रहरी कार्यालय भिमगिठे, बागलुङका प्रमुख प्रहरी वरिष्ठ नायव निरीक्षक (वरिष्ठ सई) उज्जल पौडेल मंगलबार विहान मृत भेटिए ।
बडिगाड गाउँपालिका–६ स्थित खाल बजारमा रहेको आशा होटल एण्ड खाजा घरमा मंगलबार राति दुई बजे मृत भेटिएका उनको अनुसन्धानका लागि प्रहरीले टोली बिहान मात्र पुग्यो ।
प्रहरीको टोली पुग्दा मृत पौडेलको शव पर्दाको पासो काटेर भुइँमा झिकेर राखिएको थियो। घटनास्थललाई निगरानीमा राखेको प्रहरीले अनुसन्धान थाल्यो र होटल सञ्चालक ५१ वर्षीया आशा कुँवर र उनका छोरा २० वर्षीय विनोदलाई नियन्त्रणमा लियो ।
दुवैलाई नियन्त्रणमा लिएर अनुसन्धान गर्दा आमाछोरा मिलेर वरिष्ठ सई पौडेलको हत्या गरेको जिल्ला प्रहरी कार्यालय बागलुङका सूचना अधिकारी प्रहरी नायव उपरीक्षक मदन केसीले जानकारी दिए ।
केसीका अनुसार पौडेल मंगलबार राति ८ बजेति होटलमा पुगेका थिए । होटल पुगेका पौडेलको सञ्चालक आशा र उनका छोरा विनोदसँग विवाद भयो ।
विवादपछि आमाछोराले पौडेलको टाउकोमा मुक्काले र छातीमा लात्तीले हानेर बेहोस बनाए । बहोस भएर भुइँमा ढलेका पौडेललाई आमाछोरा मिलेर पर्दाको कपडाले घाँटी कसी साढे ११ बजे हत्या गरेको अनुसन्धानबाट खुलेको प्रहरी नायव उपरीक्षक केसीले बताए ।
प्रहरीले वरिष्ठ सई पौडेलले घाँटीमा लगाएको सुनको सिक्री लुटेर किचेन र्याकमा राखेको अवस्थामा बरामद गरेको छ । पक्राउ परेका दुईविरुद्ध ज्यानसम्बन्धी कसुरमा अनुसन्धान भइरहेको केसीको भनाइ छ ।
