गोकुलेश्वर। दार्चुलाको मालिकार्जुन गाउँपालिका—६ उकुमा जंगली बँदेलको आक्रमणबाट दुई सशस्त्र प्रहरीसहित पाँच जना घाइते भएका छन् ।
मंगलबार बँदेलले एक्कासी आक्रमण गर्दा परेड खेलिरहेका सशस्त्र प्रहरी र स्थानीय घाइते भएको जिल्ला प्रहरी कार्यालयका दार्चुलालले जनाएको छ ।
बँदेलको आक्रमणबाट सशस्त्र प्रहरीका हवल्दार गोपाल साउँद, जवान हरिस बुडाल, स्थानीय ६५ वर्षीय जसोदसिंह महरा, २१ वर्षीय आयुष पाल र ५० वर्षीय रतन पार्की घाइते भएका हुन् ।
घाइतेमध्ये रतन पार्कीलाई थप उपचारका लागि धनगढी रेफर गरिएको छ । अन्य घाइतेको स्वास्थ्य अवस्था समान्य रहेको प्रहरी बताएको छ ।
सशस्त्र प्रहरीका हवल्दार र जवानहरु परेड गरिरहेका बेला बँदेलले आक्रमण गरेको थियो । अन्य तीन जना स्थानीय पनि नजिकै थिए ।
प्रतिरक्षा गर्ने क्रममा स्थानीय र डिभिजन वन कार्यालय दार्चुलाका कर्मचारीहरुले बँदेललाई मारेको दार्चुला प्रहरीले जनाएको छ ।
