गोकुलेश्वर। बैतडीसँग सीमा जोडिएको जिल्लाकोे दोस्रो ठूलो बजार तथा शैल्यशिखर नगरपालिकाको सदरमुकाम गोकुलेश्वर बजारमा बसपार्क नहुँदा पार्किङको समस्या जटिल बन्दै गएको छ ।
बढ्दो शहरीकरण अनुसार सवारी साधनको चाप बढदै जान थालेपछि अहिले पार्किङका लागि बसपार्क नहुँदा समस्या भएको छ ।
दार्चुलाको प्रमुख र एक मात्र प्रवेशद्धार भएको यस बजारमा दिनहु साना ठूला गरी सयौंको संख्यामा सवारी साधन चल्छन् तर सवारीसाधन पार्किङका लागि ठाउँ नहुँदा समस्या भएको छ ।
नगरपालिका भएका स्थानहररुमा नगर क्षेत्रलाई केन्द्रित गरी अनिवार्य रुपमा बसपार्क निर्माण गर्नुपर्ने व्यवस्था भए पनि शैल्यशिखर नगरपालिकामा व्यवस्थित बसपार्क बन्न नसक्दा सवारी साधनहरु सडकमै पार्किङ गर्नुपर्ने बाध्यता आएको छ ।
जसले गर्दा दुर्घटनामा हुने सम्भवना बृद्धि भएको छ । दिनहुँ तराई तथा काठमाण्डौंका लागि छुट्ने बसहरु र छोटो दूरीमा सञ्चालन हुने जीप,अटोहरु बसपार्क नहुँदा सडक किनारामा पार्किङ गर्नुपर्ने बाध्यता रहेको गोकुलेश्वर बस काउण्टरका संचालक श्रीराम जोशीले बताए ।
उनले भने, ’साँघुरो सडक छ । बजारका चारैतिर अव्यवस्थित पार्किङ हुन्छ । पैदल हिड्नेलाई पनि समस्या छ । सवारी दुर्घटनाको जोखिम उच्च छ ।’
बसपार्क नहुँदा बजारको चोकमै दैनिक दर्जनौं गाडीको लाम हुन्छ । जसले बजारलाई कुरूप त बनाएको छ नै सवारी दुर्घटनाको जोखिम पनि उत्तिकै बढाएको छ ।
सडकमा बस पार्किङ गर्दा सवारी आवागमनमा समस्या हुने गरेको छ । अहिले दिनहु सयौं सवारीसाधनको आवतजावत हुने गर्दछ । गोकुलेश्वरमा स्थानीयले पार्किङको व्यवस्थापन गर्नुपर्नेमा जोड दिएका छन् ।
सडकमा सवारी साधनले पार्किङ स्थल बनाउँदा यस क्षेत्रका व्यवसायीले मर्कामा परेकाको गुनासो गर्दै आएका छन् ।
व्यवसायीको पसल अगाडी नै सवारी साधन रोकिदिनाले व्यवसायमा कमी आएको व्यवसायीकाको गुनासो छ । महाकाली राजमार्गसँग जोडिएको यो क्षेत्रमा बसपार्कको उचित व्यवस्थापनको थालनी तत्काल नगर्ने होे भने यसले ठूलो दुर्घटना निम्त्याउने जोखिम छ ।
सडकको दायाँ र बायाँ किनारमा जिप, बस र अटोहरू पार्किङ गरिएका हुन्छन् । मानिसलाई हिँड्नै अप्ठ्यारो भएको छ ।
गोकुलेश्वरमा सवारीसाधन पार्किङका लागि बसपार्क नहुँदा सवारीसाधन व्यवस्थापनमा निकै समस्या भएको इलाका प्रहरी कार्यालय गोकुलेश्वरका प्रहरी प्रमुख प्रहरी निरीक्षक हिक्मत बहादुर थापाले बताए ।
‘बसपार्क नहुँदा हामीलाई सवारीसाधन व्यवस्थापनमा निकै समस्या भएको छ’, उनले भने, ‘सडक किनारमा बस,जीप,अटोहरु रोकेर राखिएको हुन्छ । ’
