गोकुलेश्वर। सुदूरपश्चिम प्रदेशमा पनि नयाँ सरकार गठनका लागि नेकपा एमाले नेतृत्वको गठबन्धनलाई बहुमत पुग्ने भएकाले नेकपा एमालेले मुख्यमन्त्री पाउन सक्ने आकलन गरिएको छ ।
एमालेको तर्फबाट मुख्यमन्त्रीमा बैतडी प्रदेशसभा ‘क’ बाट निर्वाचित सुरेन्द्र पालको सम्भावना बलियो रहेको एमाले नेताहरु बताएका छन् ।
यसअघि पाँच वर्ष माओवादी केन्द्रले सरकारको नेतृत्व गरिसकेकाले भागबण्डामा क्रममा एमालेले मुख्यमन्त्री पाउन सक्ने सम्भावना बलियो रहेको नेताहरु बताउँछन् ।
सुदूरपश्चिम प्रदेशमा सरकार बनाउन २७ जनाको समर्थन चाहिने छ । जसमा नेकपा माओवादी केन्द्र(११), नेकपा एमाले (१०), नागरिक उन्मुक्ति पार्टी(७) र राप्रपा(१) गरेर २९ सिटसहित नेकपा एमाले नेतृत्वको नयाँ गठबन्धन सरकार बन्ने भएको हो ।
अब यहाँ नेपाली कांग्रेस प्रमुख प्रतिपक्षी दलको हैसियतमा बस्नेछ भने नेकपा (एकीकृत समाजवादी) पनि प्रतिपक्षीमा पुगेको छ ।
